ദോഹ: 2026-ലെ പാഡൽ ലോകകപ്പിന് ഖത്തർ വേദിയാകുന്നത് പാഡൽ കായികരംഗത്തിന്റെ ആഗോള വളർച്ചയിലെ സുപ്രധാന നാഴികക്കല്ലാണെന്ന് അന്താരാഷ്ട്ര പാഡൽ ഫെഡറേഷൻ (FIP) പ്രസിഡന്റ് ലൂയിജി കാരരോ പ്രസ്താവിച്ചു. വൻകിട കായിക മാമാങ്കങ്ങൾ വിജയകരമായി സംഘടിപ്പിക്കുന്നതിൽ ഖത്തർ പുലർത്തുന്ന മികവിനെയും അദ്ദേഹം പ്രശംസിച്ചു.
ലോകത്തിലെ അഞ്ച് വൻകരകളിൽ നിന്നുമുള്ള ദേശീയ ടീമുകൾ അണിനിരക്കുന്ന ഖത്തർ ലോകകപ്പ്, പാഡൽ ചരിത്രത്തിലെ ഏറ്റവും വലിയ ടൂർണമെന്റാണെന്ന് അദ്ദേഹം ചൂണ്ടിക്കാട്ടി. പാഡൽ കളിയുടെ വളർച്ചയ്ക്ക് ഖത്തർ നൽകുന്ന പിന്തുണയും സഹകരണവും വിലമതിക്കാനാവാത്തതാണെന്നും രാജ്യം ഇന്ന് ഈ കായികയിനത്തിന്റെ പ്രധാന കേന്ദ്രമായി മാറിയെന്നും അദ്ദേഹം കൂട്ടിച്ചേർത്തു. ഖത്തർ പാഡൽ ഫെഡറേഷൻ പ്രസിഡന്റ് നാസർ ബിൻ ഗാനിം അൽ ഖെലൈഫിയുടെ പരിശ്രമങ്ങളെ അദ്ദേഹം പ്രത്യേകം എടുത്തുപറഞ്ഞു.ലോകമെമ്പാടുമുള്ള 4 കോടിയോളം പാഡൽ കളിക്കാരിൽ നിന്ന് തിരഞ്ഞെടുക്കപ്പെട്ട മികച്ച 256 താരങ്ങളാണ് ദോഹയിൽ മത്സരിക്കുന്നത്. സ്വന്തം രാജ്യത്തെ പ്രതിനിധീകരിച്ച് കോർട്ടിലിറങ്ങുന്ന കളിക്കാർ കായികക്ഷമതയും സ്പോർട്സ്മാൻഷിപ്പും ഉയർത്തിപ്പിടിച്ച് മികച്ച പ്രകടനം കാഴ്ചവെക്കണമെന്ന് കാരരോ ആശംസിച്ചു.
